MakeVenetoA State Again

Mile ani de repùblega

"Again" no xe un slogan tolto in prestio: xe un fato. Par pì de mile ani Venèsia la xe stada na repùblega.⁶ La xe la repùblega pì longeva de la storia: anca contando solo dal primo doxe documentà con sicuresa, la Serenìsima la xe durada pì de mile ani. Cuela romana, par far un confronto, no la xe rivada a sincue sècoli.

Na repùblega, no un regno. El doxe no l'ereditava el trono: el vegnea elexesto, e dal 1268 el se sielzeva co na procedura in diexe pasaji che alternava sorteji e votasion, pensada par render cuaxi inposìbili i inbroji e le manovre de le fasion.⁷ Cuando che el vegnea elexesto el zurava na "promision" che ghe limitava i poteri; le majistrature le durava poco e le se controlava una co l'altra. No la jera na democrasia come che la intendemo ancuò, parché a goernar ghe jera un'aristocrasia de fameje patrisie. Ma la jera un Stato de leji, stàbile par sècoli, e Gasparo Contarini el ghe ne ga descrito le istitusion inte un tratà leto in tuta Eoropa.⁸

1. 697–726La tradision la mete inte el 697 l'elesion del primo doxe da parte de le comunità de la laguna. El primo doxe documentà con sicuresa, Orso Ipato, el xe del 726. Scumìsia na storia de repùblega che la durarà pì de mile ani.
2. 1268Venèsia la se dà la leje par elexer el doxe: diexe pasaji tra sorteji e votasion. La restarà in vigor fin a la fine de la Repùblega.
3. 1339–1484Trevixo, Vicensa, Pàdoa, Verona, Belun e infin el Polèxine i pasa a la Serenìsima. Par sècoli cuaxi tuto el Vèneto de ancuò el fa parte de la Repùblega: xe el Stato da Tera.⁹
4. 12 de majo 1797Soto la presion de Napoleon, el Mazor Consejo, riunìo sensa gnanca el nùmaro legale, el vota la fine de la Repùblega. L'ùltimo doxe el xe Ludovico Manin. A otobre, col Tratà de Campoformio, Venèsia la vien cedùa a l'Àustria.¹⁰
5. 1848–1849Venèsia la se leva contro l'Àustria e la proclama la Repùblega de San Marco, guidada da Daniele Manin. Pochi mexi dopo l'asenblea la vota l'union al Piemonte par la causa italiana: vèneti e italiani insieme, za alora.¹¹
6. 22 de otobre 2017Pì de do mijoni de vèneti i va a votar al referendum so l'autonomia: afluensa torno al 57%, sì torno al 98%.¹²
7. 13 de otobre 2026Par la prima volta el Consejo dei ministri el aprova le intexe definitive so l'autonomia diferensiada del Vèneto. Manca oncora la leje del Parlamento.¹³

L'autonomia diferensiada la xe un primo paso, e la sostegnemo. Ma no basta calche conpetensa in pì concesa da Roma, materia par materia, tratativa par tratativa. Domandemo n'altra roba: che el Vèneto el torne a èsar un Stato.

Un Stato federà, no un Stato separà

In Eoropa "Stato" no vol dir par forsa sovranità asoluta. Vol dir na costitusion soa, un parlamento, un goerno, entrade sue, e la responsabilità de cuel che se decide.

La costitusion de la Baviera la scumìsia cusì: «Bayern ist ein Freistaat», la Baviera la xe un Stato lìbaro.¹⁴ Cuela del Canton Tisin, a do pasi da noaltri: «Il Cantone Ticino è una repubblica democratica di cultura e lingua italiana», parte de la Confederasion svìsara.¹⁵ Nisun pensa che i bavarexi o i tisinexi i voja ndar via. I xe Stati drento na federasion, e la federasion la xe pì forte proprio par cuesto.

Noaltri pensemo a tre liveli, ognun co i so conpiti ciari, secondo el prinsipio de susidiarietà: se decide al livelo pì visin ai sitadini, e se va su solo co serve dabon.

La lista la xe un punto de partensa, no un tratà. Ma el critèrio el xe neto: l'Itàlia no la sparise, la canbia mestier. Manco Stato sentrale che aministra tuto da Roma, pì caxa comun che tien insieme Stati federài difarenti.

Pì distanti da Roma, pì drento l'Eoropa

L'Union de ancuò la xe masa débole so le robe grande e masa pignola so le picole. So la pulìtega estera e sul fisco la decide a l'unanimità, cioè speso no la decide.

L'idea de un'Eoropa federale la xe nata proprio in Itàlia, e par metà al Nord. Carlo Cattaneo, federalista lonbardo, la ga scrita inte el 1849:

«Avremo pace vera, quando avremo li Stati Uniti d'Europa.»

Inte el 1941, confinài a Ventotene, Altiero Spinelli e Ernesto Rossi i ga scrito che la vera lìnea de division pulìtega no la pasava pì tra destra e sinistra, ma tra chi che restava fermo al Stato nasionale e chi che voleva «la creazione di un solido stato internazionale».¹⁷

Anca el primo autonomismo del Nord el jera eoropeista. Inte el marso 1982, inte el primo nùmaro de Lombardia Autonomista, Umberto Bossi el scriveva:

«Il governo accentratore di Roma […] chiacchiera di autonomie e di Europa, ma di fatto non vuole né autentiche autonomie né lo Stato Federale Europeo. Abbiamo infatti un parlamento Europeo fantasma perché creato apposta senza poteri.»

E inte el 1991, a Pontida: el Stato nasionale tradisionale «è al contempo sia troppo piccolo, sia troppo grande».¹⁹ Masa picolo par la difexa, el clima, la moneda; masa grando par la scola, la sanità, el teritorio.

Ciapemo su cuela intuision, sensa le serade identitarie che ghe jera tacà, e sensa la svolta euroscètega che, dopo l'entrada inte l'euro, la ga lasada ndar.²⁰ Inte el 2023 el Parlamento Eoropeo el ga domandà na Convension par riformar i tratài.²¹ Volemo un Vèneto che cuela riforma el la porte avanti, no che el la subisa.

Identità al plural

Voler un Stato vèneto no vol dir rinegar l'Itàlia. No xe solo na convinsion nostra: xe cuel che l'antropolojia e le siense sosiali le dixe da desene de ani so come che funsiona le identità.

Nisun xe na roba sola

El primo a descrìvarlo con precixion el xe stà Edward Evans-Pritchard, inte el 1940, studiando i Nuer del Sudan: la parola che i doparava par dir "caxa" la voleva dir el vilajo, la sesion de la tribù o la tribù intiera, drio a chi che parlava e co chi. Par farse capir, l'antropòlogo el ga zontà un exenpio de caxa soa: un ingleze incontrà in Zermània el te dirà che el vien da l'Inghiltera, incontrà a Londra el te dirà da l'Oxfordshire.²² Thomas Hylland Eriksen el ga mostrà dopo che sta lòjica a sércoli consèntrici la xe el contrario de cuela del nasionalismo, che el divide el mondo in do categorie sole, drento o fora: cuà invese «ghe xe gradi de drento e de fora».²³

La reserca dopo la ga confermà e slargà l'idea. Inte el 1969 Fredrik Barth el ga spiegà che un grupo no el vien definìo da un elenco de trati culturali, ma dal confin che el segna co i altri: «the ethnic boundary that defines the group, not the cultural stuff that it encloses», el confin che definise el grupo, no el contegnùo culturale che ghe sta drento. E cuei confini i resta anca se le persone le li traversa, le entra e le vien fora inte el corso de la vita.²⁴ Èsar vèneti, alora, no xe un exame de polenta e de dialeto: xe n'apartenensa a cui se pol rivar.

Za inte i ani Sincuanta Clyde Mitchell el vardava inte le sità minerarie de l'Àfrica australe che l'apartenensa a la tribù la contava in serte situasion e no in altre.²⁵ Rogers Brubaker el lo ga verificà inte na sità eoropea divixa tra do nasionalità, Cluj, in Romania: anca là l'etnicità la conta solo in serti momenti de la vita de tuti i dì. «Ethnicity is not a thing, not a substance», el scrive: xe un modo de lèzar el mondo, e senpre «solo uno tra tanti».²⁶

Benedict Anderson el ga definìo la nasion na "comunità imajinada": nisun italian el conosarà mai la majoransa dei altri italiani, epur el se sente parte de la istesa comunità. Imajinada no vol dir falsa. Ogni comunità pì granda de un vilajo la xe imajinada, e le comunità le se distingue «no par la so falsità o autentisità, ma par el stile in cui le vien imajinade».²⁷ Vale par l'Itàlia, par l'Eoropa e par el Vèneto. E vale anca l'avertimento de Eric Hobsbawm: tante tradision che le par antichìsime le xe resenti, a volte inventade.²⁸ Lo savemo, e par cuesto no vendemo miti.

El riscio vero, difati, no xe le identità al plural ma cuele ùneghe. L'antropòlogo Francesco Remotti el ga scrito che l'identità «è un concetto, ma noi lo utilizziamo come se fosse un mito», e el ga meso in guardia contro l'osesion identitaria che la ga traversà anca la pulìtega del Nord.²⁹ Amartya Sen, premio Nobel par l'economia, el ga ciamà "solitarista" l'idea che ognun el apartegna a un grupo solo: «un modo vero eficace de capir mal cuaxi tuti al mondo».³⁰ Par cuesto no parlemo de n'identità vèneta da difénder contro calcun, ma de n'apartenensa da coltivar insieme a le altre.

Cosa che dixe i dati

I italiani i lo vive za. Inte l'Eurobarometro so i valori e le identità, l'82% el se identìfica co la so rejon, l'80% co la so nasionalità e el 64% co l'Eoropa: tute e tre le persentuali le xe pì alte de la media eoropea.³¹ In Vèneto, cuando che pì de metà del Nord-Est el se dixeva a favor de l'indipendensa de la so rejon, el 78% el se dixeva istesso orgolioso de èsar italian: Demos el lo ga ciamà "dopio orgolio".³² I politòlogi i parla de identità una drento l'altra, come le matrioske: un renan drento un todesco drento un eoropeo.³³

E le identità al plural le fa ben al viver insieme. Liesbet Hooghe e Gary Marks i ga mostrà che no conta cuanto che uno el se sente ligà a la so nasion, ma se cuela identità la xe esclusiva o inclusiva: chi che se sente solo nasionale el tende a l'euroscetisismo, chi che se sente insieme «catalan, spagnol e eoropeo» el sostien l'integrasion. In Bèlgio chi che se sente solo belga o solo fiamingo el xe contrario al goerno so pì liveli, chi che se sente tute do le robe el lo sostien.³⁴ La psicolojia sosiale la riva a la istesa concluxion: l'armonia tra i grupi se la otien «tegnendo, no indebolendo, le identità dei sotogrupi» drento n'identità comun, mentre inponer n'identità sola la fa crésar el pregiudisio proprio in chi che xe pì ligà a la so comunità.³⁵

Xe proprio la lòjica dei tre liveli. El federalismo el xe la forma pulìtega de le identità al plural: el riconose el Vèneto drento l'Itàlia e l'Itàlia drento l'Eoropa, e proprio par cuesto el tien insieme invese de dividar.

Cosa che proponemo

1. Un vèneto stàndar, insegnà a scolaEl vèneto el ga na tradision scrita continua da pì de sete sècoli: el xe stà léngua de uxo ufisiale de la Serenìsima, e dopo léngua de Ruzante e de Goldoni.³⁶ E el xe oncora vivo: el 55% dei vèneti el lo dòpara in fameja, contro el 38% de la media italiana. Ma inte el 2015 el jera el 62%, e l'UNESCO el lo considera na léngua vulneràbile.³⁷ Par no pèrdarlo proponemo un vèneto stàndar scrito, definìo da n'acadèmia indipendente de linguisti, che el staga a fianco de le parlade locali sensa sostituirle, e insegnà in tute le scole insieme a l'italian e a l'ingleze, a tuti i fioi, da calsiasi fameja che i vegna. I baschi i lo ga fato co l'euskara batua dal 1968; el romancio dei Grixoni el insegna che va fato insieme ai parlanti, no calà da l'alto.³⁸
2. El vèneto riconosùo par lejeAncuò el vèneto no xe tra le léngue tutelade da la leje nasionale del 1999, e la Corte costitusionale la ga stabilìo che na Rejon no la pol zontarlo da sola. L'Itàlia, po, la ga firmà inte el 2000 la Carta eoropea de le léngue rejonali o minoritarie, ma no la la ga mai ratificada.³⁹ Domandemo tute do le robe: el vèneto inte la leje nasionale e la ratifica de la Carta.

Chi decide paga, chi paga decide

Un Stato sensa un fisco suo no xe un Stato: xe un ufisio perifèrego che spende schei decixi da altri.

Ogni ano i vèneti i versa al Stato tanto de pì de cuel che torna sul teritorio in spexa pùblega. Cuanto de pì, nisun lo sa dir exatamente: drio al mètodo e a l'ano, le stime le se difarensia de tanti miliardi.⁴⁰ Za cuesto xe el problema. Un sitadin el gavarìa da poder saver cuanto che el paga, a chi, e par cosa.

Intanto, ai nostri confini, el Trentin-Alto Àdexe e el Friul-Venesia Julia i ga el statuto spesiale e i tien la gran parte de le tase ciapade sul so teritorio. No a caxo pì de un comun vèneto de confin el ga domandà de pasar da l'altra parte, e Sapada, inte el 2017, la lo ga fato.⁴¹

Proponemo na régola sénplise:

• El Stato vèneto el scuode e el tien le tase che serve par le so conpetense, e el ghe ne risponde ai eletori vèneti.
• El contribuise a un fondo de perecuasion tra i Stati federài, co régole fise e nùmari pùbleghi, come che sucede tra i Länder todeschi e i cantoni svìsari.
• La solidarietà la resta, ma la deventa diciarada, mixuràbile e ligada ai rexultati. No un pozo sensa fondo, no un ricato.

No domandemo de smétar de jutar chi che ga manco. Domandemo de saver cuanto che demo, e de poder decìdar come che spendemo el resto.

Marcà sì, ma par i sitadini

Credemo inte el capitalismo e inte la lìbara inprexa: el Vèneto el xe fato de sentenara de miliara de inprexe, cuaxi tute picole, cuaxi tute nate dal gnente.

Ma l'Eoropa che volemo la ga da èsar pensada par i sitadini. Un stato sosiale largo, e n'Union bona de intervegnir so l'economia e de far da àrbitro: par ridur le disugualianse, regolar i marcài co i xe sbilansài, e inpedir che pochi giganti i deta le régole a tuti i altri.

No xe n'utopia. Xe za scrito inte el Tratà so l'Union Eoropea, che el promete «un'economia sociale di mercato fortemente competitiva, che mira alla piena occupazione e al progresso sociale».⁴² Domandemo solo che a cuela promesa ghe se daga i strumenti par èsar mantegnùa: un bilancio federale vero, régole comuni sul lavoro e sul fisco de le grande inprexe, na rete de protesion eoropea.

E no xe n'idea portada da fora. La prima cassa rurale d'Itàlia la xe nata in Vèneto, a Loreja, in provincia de Pàdoa, el 20 de zugno del 1883: Leone Wollemborg el ga meso insieme na trentina de contadini e picoli paroni parché i se prestase schei tra de lori, invese de finir in man ai usurai.⁴³ Casse rurali, sosietà de mutuo socorso, cooperative: cuà l'inprexa e la solidarietà le xe senpre ndade insieme. Xe cuel che ghe domandemo a l'Eoropa.

Par no capirse mal

• No xe secesionVolemo pì Eoropa e un'Itàlia federale, no confini novi. Un Stato federà el sta drento la federasion.
• No xe contro el SudLa perecuasion tra i teritori la resta. Domandemo che la sìpia ciara e ligada ai rexultati, no che la sparisa.
• No xe contro l'ItàliaSemo italiani e restemo italiani. L'Itàlia la xe uno dei tre liveli, no un aversario.
• No xe ètnegoVèneto xe chi che vive e lavora in Vèneto, da calsiasi parte che el vegna. La léngua vèneta la xe un patrimonio, no un exame de entrada.
• No xe nostalgiaLa Serenìsima no la torna. Torna l'idea che un teritorio el se posa goernar ben da solo, drento calcosa de pì grando.
• No xe un partìoXe un'idea. Chi che la condivide el la pol portar ndove che el vol.

Da ndove che vien cuel che scrivemo

Le fonti le xe le istese de la version italiana.

1. Diogene Laerzio, Vite dei filosofi, VI, 63; sul concetto: Stanford Encyclopedia of Philosophy, "Cosmopolitanism".
2. A. Marzo Magno, L'alba dei libri. Quando Venezia ha fatto leggere il mondo, Garzanti, 2012; AGI, 2017.
3. L'emigrazione veneta 1876–1900: Finestre sull'Arte; Biblioteca delle Radici.
4. Esportazioni del Veneto nel 2025, circa 80 miliardi di euro: ICE, su dati Istat.
5. K. A. Appiah, "Rooted Cosmopolitanism", in The Ethics of Identity, Princeton University Press, 2005, pp. 213–272: PhilPapers.
6. Repubblica di Venezia (tradizionalmente 697–1797): voce Wikipedia.
7. M. Mowbray, D. Gollmann, "Electing the Doge of Venice: Analysis of a 13th Century Protocol", 2007: PDF.
8. G. Contarini, De magistratibus et republica Venetorum, 1543; ed. inglese The Republic of Venice, University of Toronto Press (Lorenzo Da Ponte Italian Library).
9. I domini di Terraferma della Repubblica: voce Wikipedia.
10. La caduta della Repubblica, 1797: voce Wikipedia.
11. Repubblica di San Marco (1848–1849): voce Wikipedia.
12. Referendum consultivo sull'autonomia del Veneto, 22 ottobre 2017: Il Post, 23 ottobre 2017.
13. Consiglio regionale del Veneto, comunicato del 14 ottobre 2026: ANSA.
14. Costituzione della Baviera, art. 1: gesetze-bayern.de.
15. Costituzione della Repubblica e Cantone Ticino (1997), art. 1: Raccolta delle leggi del Cantone Ticino.
16. C. Cattaneo, Corollarii alle Memorie, Bruxelles, 1849; citato in Zanichelli, antologia.
17. A. Spinelli, E. Rossi, Per un'Europa libera e unita (Manifesto di Ventotene), 1941: voce Wikipedia.
18. Lega Nord, Cronistoria 1979–1987, pp. 34–35, che riporta il primo articolo di Lombardia Autonomista, marzo 1982: copia d'archivio.
19. Lega Nord, Cronistoria 1988–1995, p. 9, discorso di Pontida del 16 giugno 1991: copia d'archivio.
20. M. Huysseune, "A Eurosceptic vision in a Europhile country: the case of the Lega Nord", Modern Italy 15(1), 2010, pp. 63–75, doi:10.1080/13532940903477880.
21. Parlamento europeo, risoluzione del 22 novembre 2023 sulle proposte di modifica dei trattati: Eunews.
22. E. E. Evans-Pritchard, The Nuer, Oxford, Clarendon Press, 1940, pp. 135–137 e 142–148: archive.org. In italiano: I Nuer. Un'anarchia ordinata, Milano, Franco Angeli, 1975.
23. T. H. Eriksen, "Ethnicity versus Nationalism", Journal of Peace Research 28(3), 1991, pp. 268–269: PDF; Ethnicity and Nationalism: Anthropological Perspectives, Pluto Press, 1993.
24. F. Barth (a cura di), Ethnic Groups and Boundaries, Bergen–Oslo/Londra, 1969, Introduzione, pp. 9–10 e 15.
25. J. C. Mitchell, The Kalela Dance, Rhodes-Livingstone Papers 27, Manchester University Press, 1956, pp. 30–34: testo.
26. R. Brubaker, M. Feischmidt, J. Fox, L. Grancea, Nationalist Politics and Everyday Ethnicity in a Transylvanian Town, Princeton University Press, 2006, p. 15; R. Brubaker, Ethnicity without Groups, Harvard University Press, 2004.
27. B. Anderson, Imagined Communities, 1983 (Verso, ed. 2006, p. 6); trad. it. Comunità immaginate, Laterza, 2018.
28. E. J. Hobsbawm, T. Ranger (a cura di), The Invention of Tradition, Cambridge University Press, 1983, p. 1; trad. it. L'invenzione della tradizione, Einaudi.
29. F. Remotti, Contro l'identità, Laterza, 1996; L'ossessione identitaria, Laterza, 2010; "L'ossessione identitaria", Rivista Italiana di Gruppoanalisi XXV, 2011, pp. 9–29.
30. A. Sen, "Violence, Identity and Poverty", Journal of Peace Research 45(1), 2008, p. 6; Identità e violenza, Laterza, 2006.
31. Commissione europea, Special Eurobarometer 508: Values and Identities of EU citizens, 2021, pp. 50 e 69: Ufficio delle pubblicazioni UE.
32. Demos & Pi, Osservatorio sul Nord Est, marzo 2015: demos.it.
33. T. Risse, "Neofunctionalism, European identity, and the puzzles of European integration", Journal of European Public Policy 12(2), 2005, pp. 291–309; J. Díez Medrano, P. Gutiérrez, "Nested identities", Ethnic and Racial Studies 24(5), 2001.
34. L. Hooghe, G. Marks, "Calculation, Community and Cues", European Union Politics 6(4), 2005, pp. 419–443, doi:10.1177/1465116505057816; "Does Identity or Economic Rationality Drive Public Opinion on European Integration?", PS: Political Science & Politics 37(3), 2004, pp. 415–420.
35. M. Hornsey, M. Hogg, "Assimilation and Diversity", Personality and Social Psychology Review 4(2), 2000, pp. 143–156, doi; R. Crisp, C. Stone, N. Hall, Personality and Social Psychology Bulletin 32(2), 2006, pp. 230–243; per una lettura critica: J. Dovidio e altri, Social Issues and Policy Review 10(1), 2016, pp. 6–46.
36. F. Ursini, "Dialetti veneti", Enciclopedia dell'Italiano, Treccani, 2011: treccani.it.
37. ISTAT, L'uso della lingua italiana, dei dialetti e delle lingue straniere. Anno 2024, gennaio 2026: istat.it; UNESCO, Atlas of the World's Languages in Danger, 2010, citato in F. Ursini, "Sono vitali le varietà venete?", Quaderni Veneti, 2012.
38. Euskaltzaindia, congresso di Arantzazu, 1968; Rumantsch Grischun, 1982, e il ritorno agli idiomi locali in molte scuole dal 2011: Dizionario storico della Svizzera.
39. Legge 15 dicembre 1999, n. 482, art. 2; Corte costituzionale, sentenze 170/2010 e 81/2018; Senato, dossier sulla ratifica della Carta europea delle lingue regionali o minoritarie: senato.it.
40. AGI, fact-checking sul residuo fiscale del Veneto, 2019; L. Loiacono, L. Rizzo, R. Secomandi, Quaderni del Dipartimento di Economia, Università di Ferrara, 2025.
41. Sappada, passata dal Veneto al Friuli Venezia Giulia nel 2017: voce Wikipedia.
42. Trattato sull'Unione europea, art. 3, par. 3: EUR-Lex.
43. La prima cassa rurale italiana, Loreggia 1883: Milano Finanza; Leone Wollemborg.